Pian via dal moto che la legrëza possa mé unì gududa deplën sce la vën partida cun d'autri sons dla minonga che la persones sënt propi l bujën de partì n generel nce si tacamënt al ncësa, y ciuldi no, nce si ncresciadum cun persones che ie te si medema situazion. Oradechël ne se lascia n ladin dla Dolomites che vën da n raion unich al mond per si belëza nia tan saurì desravisé. Ulësse perchël rengrazië la Repartizion per la scola y la cultura ladina che à purtà pro a renfurzé tres chësc proiet culturel – l forum "Ladins tl monn" – l'identificazion dla ladines y di ladins che ie ora per l mond cun si ncësa.
Florian Mussner assessëur ai lëures publics y ala scola y cultura ladina
L fin dl proiet “Ladins tl Monn” ie chël de sustenì cuntac danter i Ladins che viv ora de Südtirol, dl Trentino y dla provinzia de Beluno y de ti pité formes de comunicazion inovatives. Chisc cuntac dëssa purté pro a mantenì y svilupé nosta rujeneda y a renfurzé la cuscienza ladina sëura duc i cunfins ora.
Giorgio Moroder Los Angeles Produzënt y cumponist
Chësc proiet culturel ie de gran mpurtanza per na pitla mendranza de 30.000 persones, sciche chëla di ladins: L ie per mé n gran plajëi pudëi tò pert al proiet “Ladins tl Monn”, ajache nce sce son bel demez da truep ani, ei mo for de bon cuntac cun la jënt ladina.
Richard Agreiter scultur
Mi lian cun la Ladinia é dër sterch, porchël ôi ti lascè dötes mies operes y mi podëi al Museum Ladin Ćiastel de Tor. Canche i sun tla Ladinia me sënti a ćiasa y insciö ti ài metü inom Gana de Val Mezdì a mia ćiasa de Steinberg. Por chëstes rajuns sostëgni le proiet Ladins tl Monn.
Robert Dejaco New York Chef de cuisine “Rockefeller Center”
Porvia de mi laûr sunsi stè bun de mantignì de bogn contać cun la jënt de mia tera. Chësc ajache t’America aprijëion dër i produć alimentars de nüsc raiuns. Le network “Ladins tl Monn” me dà la poscibilité d’ester virtualmënter te mia valada, la Val Badia, a chëra che i sun tres ćiamò dër lié.
Sandra Alverà Bruxelles Panasonic
I sostëgn l iniziativa Ladin tl monn, ciodi che al me da la poscibilité de me mantignì n contat cun atri ladins fora por l monn y insciö conservè mia cultura y lingaz.
Lucia Clara Peitz Münster Doturia de medejina
I sun dër contënta dla scomenciadia “Ladins tl Monn” che po ester dër ütla por s’incuntè y se contatè danter ladins da foradecà. Chësc proiet dëida varì l’incherscimun che vëgn sö canche an s’un va da ćiasa. Le cör resta pö dagnora lié ala valada da chëra che an pëia ia y porchël él bel da podëi tó sö contat cun jënt che vëgn dal medemo post.
